बीरगंज – २७ मंसिर// मधेश एक्सप्रेस
हुम्ला सदरमुकाम सिमकोट बजारमा आगलागी हुँदा लाखौँको क्षति भएको छ । सिमकोट गाउँपालिका- ५ सिमकोट बजार नेपाल विद्युत् वितरण केन्द्रको कार्यालय नजिकै रहेको नेपाली कांग्रेस हुम्लाका उपसभापति वसन्त रोकायाको घरमा आगलागी भएको हो ।
मंगलबार बिहान ९ बजेर ४० मिनेटमा घरको दोस्रो तल्लामा रहेको भान्सामा जडान गरिएको सुधारिएको फलामे चुल्होमा बालिएको आगो चुलोको पाइपबाट दोस्रो तल्लाको छतमा रहेको काठको सिलिङमा भेटाएपछि आगलागी भएको हुनसक्ने प्रहरीले अनुमान गरेको छ ।
आगलागीबाट चार लाख रुपैयाँ नगदसहित लत्ताकपडा, गरगहना, फर्निचर, प्रिन्टर, लिउ-फेरुवा र गलैँचालगायत लाखौँ मूल्य बारबारको सामान जलेर नष्ट भएको हुम्ला प्रहरी प्रमुख डिएसपी रवीन्द्र खनालले जानकारी दिए ।
आगलागी भएको ३ घण्टा पछि स्थानीय बासी, नेपाली सेना, नेपाल प्रहरी, सशस्त्र प्रहरी, र कर्मचारी सबैको सहयोगमा आगो नियन्त्रणमा लिएको लिएका हुन् ।
मंगबार बिहान अचानक भएको आगलागीमा उपसभापति रोकयाको ३ तले घरको माथिल्लो तला पूर्ण रूपमा नष्ट हुनुका साथै लाखौँको क्षति भएको प्रहरीले जनाएको छ ।
