आम जनता पार्टी (आजपा)का अध्यक्ष एवं पूर्वमन्त्री प्रभु साहले ‘भ्रष्ट नेता’लाई जनस्तरबाटै बहिष्कार गर्नुपर्ने बताएका छन् । मुलुकमा भ्रष्टाचार, अनियमितता एवं कुशासन बढदै गईरहेको बताउदै उनले भ्रष्टाचारीलाई बहिष्कार नगरेसम्म मुलुक नबन्ने दाबी गरे ।
बडादशैं, शुभ दिपावली एवं छठ पर्वको अवसरमा बाराको कोल्हबी र रौतहटको फतुवा बिजयपुर नगरपालिकाको दुधिअवामा आज आयोजित छुटाछुट शुभकामना अदानप्रदान एवं भेटघाट कार्यक्रममा सहभागि आजपा अध्यक्ष साहले समृद्ध मुलुक निर्माणका लागि भ्रष्टाचारलाई जनकारवाही गर्नैपर्ने बताए ।
‘दिनदिनै मुलुकमा भ्रष्टाचार बढदै गईरहेको छ । आम जनता लाचार बनेका छन् । भ्र्रष्ट नेताहरुकै शासन व्यवस्थामा हालीमुहाली रहेको छ । उनीहरुले जनताको पैसा जसरी पनि लुटने धन्दा गरिरहेका छन्’ आजपा अध्यक्ष साहले भने, ‘समृद्ध नेपाल निर्माणका लागि सबैभन्दा पहिला भ्रष्ट नेताहरुलाई बहिष्कार गर्नैपर्छ । उनीहरुलाई सरकारले पनि कारवाही कारवाही गर्नुको साटो संरक्षण दिईरहेकाले अब त्यस्त भ्रष्टहरुलाई जनकारवाही गर्न आम जनता तयार हुनुपर्छ ।’
ठुला दलका शीर्ष नेताहरु भ्रष्टाचारमा संलग्न भएको र भ्रष्टाचार गरेको पुष्टि हुँदाहुँदै पनि एकले अर्कोलाई कारबाही हुनबाट जोगाउने र देशमा लुटेर विदेशमा पैसा थुपार्ने काम भईरहेकाले आम जनताले गाउँगाउँबाट आवाज उठानुपर्ने उनको भनाई छ ।
काण्डैकाण्डले मुलुक बदनाम भएको उनले बताए । गिरीबन्धु टि–स्टेट देखी ललिता निवास लगायतका सयौं काण्डमा ठुला नेताहरुकै संलग्नता पुष्टि भईसकेको उनले बताए । तर सरकार र भ्रष्टाचार निवारण गर्ने निकायहरुले त्यस्तालाई कारवाही गर्नुका साटो पुरस्कृत गर्ने काम गरिरहेको आरोप उनले लगाए ।
‘सरकारकै संरक्षणमा भ्रष्टाचार भईरहेको छ । उनीहरु आफै संलग्न छन् । भ्रष्टाचार निवारण गर्ने, भ्रष्टाचारीलाई कारवाही गर्ने निकाय कमिसन लिएर मौन बसेको छ, लाग्छ की उसलाई केही थाहा नै छैन्’ साहले भने, ‘यि सबै मिलेर मुलुक लुटेका छन् । नेपालमा लुटने र अकुत सम्पती विदेशमा थुपार्ने काम यिनीहरुले गरिरहेका छन् । आज मुलुक कंगाल बनेको छ, आर्थिक अवस्था संकटमा छ । तपाई हामी कहिलेसम्म चुप लागेर बस्ने ? अब आवाज नउठाए हाम्रा सन्ततीहरुले हामीलाई नै गाली गर्नेवाला छन् ।’
राज्यको हरेक निकायमा भ्रष्टाचार बढेको उनले बताए । बिनाखुस कुनै काम नहुने बताउँदै प्राप्त खुस लतदेखी माथी मन्त्रीहरुसम्म पुग्ने गरेको उनले आरोप लगाए । जुन देशका प्रधानमन्त्री, मन्त्रीहरु नै भ्रष्टाचारमा लिप्त भएपछि त्यहाँ समृद्धिको कल्पना गर्नु भनेको दिवा सपना हेर्नु मात्रै भएको टिप्पणी उनले गरे ।
मुलुकमा रोजगार दिन नसकेको सरकार वैदेशिक रोजगारीमा जाने कामदारसँग पनि घुस लिईरहेको उनले बताए । साथै, उनले युवाहरुले विदेशमा दुःख गरेर कमाएको रकम अवैध रुपमा हुण्डीमार्फत दुरुपयोग भइरहेको पनि बताए । नेपालका नेता, प्रशासक र अवैध व्यापारीहरुले हुण्डीमार्फत पैसा ल्याएर आफ्नो कालोधन विदेशमा थुपार्ने काम गरिरहेको आजपा अध्यक्ष साहको आरोप छ । नेताहरु विना लगानी मेनपावरको शेयर होल्डर बनिरहेको पनि उनले बताए । यस्ता प्रकारका दुष्चक्र अन्त्य हुनु्पर्ने र त्यसका लागि आम जनताले नै आवाज उठानुपर्ने उनले बताए ।
‘हाम्रा युवाहरुलाई आज मरुभूमिमा मर्न बाध्य बनाइएको छ । ती युवाहरुको खुनपसिनाले आर्जित रेमिट्यान्सलाई नेपालका भ्रष्ट नेताहरु, यहाँका प्रसाशकहरु र अवैध व्यापारीहरुले आफ्नो कालो धनलाई सट्टापट्टाको अस्त्रको रुपमा प्रयोग गरिरहेको सन्दर्भ छ’ उनले भने । असुरक्षित श्रम स्वीकृतिका कारण विदेशमा ज्यान गुमाउने युवाहरुको मृत्यूलाई उनले ‘राज्यद्वारा गरिएको हत्या’ का रुपमा परिभाषित गरे । यसको जिम्मेवारी सरकारले लिनुपर्ने बताए ।
