जनकपुर– धनुषाको क्षीरेश्वरनाथ नगरपालिका–८ दिगम्बरपुरका २५ वर्षीय शिवशंकर महतोको हत्या प्रकरणमा प्रहरीले उनकै श्रीमती सिर्जनालाई पक्राउ गरेको छ।
महोत्तरी प्रहरीले सिर्जनलाई आईतबार नै पक्राउ गरेको हो। डीएसपी सन्तुलाल जयसवारका अनुसार शिवशंकरको शव फेला परेदेखि नै सिर्जनालाई अनुशन्धानको केन्द्रमा राखिएको थियो। उनले शिवशंकरलाई मोटरसाइकलमा लैजाने व्यक्तिको समेत पहिचान भइसकेको बताए।
शिवशंकरको शव शुक्रबार साँझ साढे ५ बजे महोत्तरीको गौशाला नगरपालिका–८ सागरनाथ वनमास्थित रेल्व ट्रयाकबाट करिब १ मिटर दक्षिणतर्फ फेला परेको थियो। प्रहरीका अनुसार शिवशंकरको गर्धनमा खुकुरी प्रहार गरेको र हत्यापछि घिसारेको देखिएको छ।
जानकारी अनुसार डेढ महिनाअघि मात्रै भारतको मुम्बईबाट घर फर्केका शिवशंकर बिहीबार दिउँसो श्रीमती सिर्जना र १० महिने छोरासहित ससुराली घर बर्दिबास नगरपालिका–५ पशुपतिनगर बन्द्र जान मोटरसाईकलमा निस्किएका थिए।
तीनै जना महेन्द्रनगरसम्म सँगै गएको खुलेको छ। त्यहाँबाट सिर्जनाले माइतबाट दुईवटा मोटरसाइकल बोलाएर एउटामा १० महिने छोरासहित सिर्जना र अर्कोमा शिवशंकर चढेको जनाईएको छ।
कुनै रिसिईबी वा श्रीमतीको प्रेमसम्बन्धका कारण शिवशंकरको हत्या भएको हुनसक्ने आशंका प्रहरीको छ। भाइ राम महतोका अनुसार केही दिन अघि ससुरालीमा विवाद हुँदा शिवशंकरमाथि कुटपिट भएको थियो। विवादपछि उनी ससुराली जान मानेका थिएनन्। उनलाई श्रीमतीले नै हजुरबुबाको मृत्यु भयो भनेर ससुराली जान बाध्य बनाएकी थिईन।
