काठमाडौं । काठमाडौंमा जारी नेपाल प्रिमियर लिगप्रति दर्शकको जति उत्साह छ अनलाइन सट्टेबाजी गर्नेहरूको जगजगी पनि उस्तै देखिएको छ ।
एनपीएलमा सट्टेबाजी गर्ने र खेलाडीलाई स्पट फिक्सिङको प्रस्ताव गरेको आरोपमा प्रहरीले हालसम्म १० जनालाई पक्राउ गरिसकेको छ । कतिसम्म भने स्पट फिक्सिङका लागि खेलाडीलाई एक करोड रूपैयाँसम्मको प्रस्ताव गरेको पाइएको छ । पक्राउ पर्ने १० मध्ये ९ जना भारतीय नागरिक हुन् । उनीहरू सट्टेबाजी गराउनकै लागि भारतबाट आएकोसमेत खुलेको छ ।
एनपीएलमा खेलाडीलाई प्रायोजन गर्ने बहानामा इन्स्टाग्राममार्फत सम्पर्क गरेर अनुचित प्रभाव पार्न खोजेको आरोपमा प्रहरीले मैसिर ३ गते एक नेपाली र एक भारतीयलाई पक्राउ गर्यो । स्पट फिक्सिङका लागि खेलाडीलाई १ करोड रूपैयाँसम्मको प्रस्ताव गरेको देखिएपछि भारतको हरियाणाका दिलप्रित सिंह र नेपाली युवती रेविकासिंह ठकुरीलाई प्रहरीले नियन्त्रणमा लिएको हो ।
त्यसैगरी प्रत्येक बलको आधारमा ‘बेटिङ’ अर्थात् सट्टेबाजी चलाइरहेको आरोपमा ८ जना भारतीय मंसिर ६ गते पक्राउ परे । पक्राउ पर्नेमा भारतको आन्ध्र प्रदेश घर भइ अहिले काठमाडौं बस्दै आएका राजा यदुला, महेश बाबु, पण्डित श्रीनिवासुलु, सेख सोयब, नभिन मड्डेला, महमद रफी सेख, साईकुमार, सेख चन्द बसल हुन् ।
उनीहरू कीर्तिपुरस्थित त्रिवि क्रिकेट मैदानको प्यारापिटबाट प्रकाउ परेका हुन् । उनीहरूले ‘स्टेक डटकम’ र ‘बेटबुक डटकम’ जस्ता वेबसाइटमार्फत झन्डै २ करोड ५ लाख रूपैयाँ बराबरको कारोबार गरेको देखिएको जिल्ला प्रहरी परिसर काठमाडौंका प्रवक्ता पवनकुमार भट्टराईले जानकारी दिनुभयो ।
फिक्सिङका आधारमा निश्चित समूहले सट्टेबाजी लगाउने र परिणाम आफ्नो पक्षमा पारेर रकम असुल गर्ने गतिविधिबारे प्रशासन र अन्तर्राष्ट्रिय क्रिकेटको नियमनकारी निकाय आईसीसीले निगरानी गर्ने गरेका छन् । नेपाल प्रहरीले अहिले पनि सट्टेबाजी लगाउनेहरुको निगरानी गरिरहेको छ । तर पूर्वप्रहरी नायव महानिरीक्षक हेमन्त मल्ल ठकुरीले प्राविधिक अपराध अनुसन्धानमा सरकारले अझै पर्याप्त लगानी गर्न नसकेको बताउनुभयो ।
एनपीएल सुरू भएकै दिन खेलाडीलाई अवैध प्रस्ताव र समूहगत रूपमै बेटिङ्का लागि भारतबाट सट्टेबाजहरू आएको प्रहरी अनुसन्धानबाट खुलेको छ । खेलाडीलाई प्रलोभनमा पारेर सट्टेबाजीका लागि प्रयोग गर्ने माध्यमबारे पनि अनुसन्धान भइरहेको छ ।
