काठमाडौं । नेपाली कांग्रेस केन्द्रीय समितिको बैठक आठौं पटक स्थगित भएको छ ।
१५औँ महाधिवेशन नियमित गर्ने कि विशेष भन्ने विषयमा कुरा नमिल्दा बैठक आठौं पटक स्थगित भएको हो । भोलि अर्थात् आइतबारका लागि बोलाइएको बैठक पनि सूचना निकालेर सोमबारसम्मका लागि स्थगित गरिएको छ । महाधिवेशनको कार्यतालिका तय गर्न गत असोज २८ गतेदेखि केन्द्रीय समितिको बैठक बस्दै आएको छ । तर १२ वटा बैठक बस्दा पनि कुरा मिल्न सकेको छैन ।
पटक-पटक गरी ८ पटक त बैठक नै सारिएको छ । केन्द्रीय समिति बैठकमा महामन्त्री गगन थापा र सहमहामन्त्री महेन्द्र यादवले कार्यतालिकाबारे छुट्टा-छुट्टै प्रस्ताव पेस गरेका छन् । नियमित नभए विशेष महाधिवेशन गर्नुपर्ने भन्दै ५४ प्रतिशत प्रतिनिधिले हस्ताक्षरसमेत बुझाइसकेका छन् । तर संस्थापन पक्षले फागुन २१ गते हुने प्रतिनिधि सभा सदस्य निर्वाचनपछि मात्र महाधिवेशन गर्नुपर्ने अडान राखेको छ ।
महामन्त्री थापा र अर्का महामन्त्री विश्वप्रकाश शर्माले भने नियमित नगर्ने भए विशेष महाधिवेशनको विकल्प नरहेको बताइरहेका छन् । सभापति शेरबहादुर देउवाले विवाद मिलाउने प्रयास गरिरहे पनि अझै सहमति जुट्न सकेको छैन । आज पनि नेताहरूबीच दिनभर छलफल भए पनि सहमति जुट्न नसकेपछि भोलिका लागि तय भएको बैठक सोमबारसम्मका लागि स्थगित गरिएको हो ।
