काठमाडौं । गत भदौ २३ र २४ को घटनाबारे जाँचबुझ गर्न गठित उच्चस्तरीय आयोगले छानबिन अन्तिम चरणमा पुगेको दाबी गरिरहेको छ ।
तर तत्कालीन सरकारका प्रधानमन्त्री, गृहमन्त्रीलगायतका राजनीतिक नेतृत्वसँग भने बयान लिन सकेको छैन । आयोगको समयसीमा अब २४ दिन बाँकी छ । राजनीतिक व्यक्तित्वसँग बयान लिन के गरिरहको छ त आयोग ? कहिले लिन्छ बयान ? भदौ २३ र २४ को घटनाबारे जाँचबुझ गर्न गठित उच्चस्तरीय आयोगले छानबिन अन्तिम चरणमा पुर्याइसक्दा पनि तत्कालीन प्रधानमन्त्री केपी शर्मा ओली र गृहमन्त्री रमेश लेखकको बयान कसरी लिने भन्नेमा अझै अन्योलमा छ ।
तर आयोग अझै भनिरहेको छ- अब राजनीतिक नेतृत्वको बयान सुरू हुन्छ । तर कहिले लिन्छ त बयान ? त्यसो त अहिलेसम्म पनि आयोगले ओली, लेखकलगायतलाई स्थानहद तोकेको पत्रसमेत उपलब्ध गराएको छैन । न राहदानी रोक्का राखिएको जानकारी नै दिएको छ ।
तत्कालीन गृहमन्त्री लेखकले कुनै सूचना जानकारी र पत्र प्राप्त नगरेको र स्थान हद तोकिएको र राहदानी रोक्का भएको जानकारी सञ्चारमाध्यमबाट थाहा पाएको जिकिर गर्नुभयो । पू्वप्रधानमन्त्री ओलीले पनि आफूलाई त्यस्तो कुनै पत्र प्राप्त नभएको बताउनुभएको छ। ओलीको सचिवालयले पनि सोहि कुरा दोहोर्याएको छ।
आयोगले सुरक्षाकर्मी र प्रशासनिक नेतृत्व गरी अहिलेसम्म २४ जनाको मात्र बयान लिएको छ भने पहिलो चरणको बयानको काम सकिएको जनाएको छ । आयोगलाई सरकारले भदौ २३ र २४ गतेको घटनाको जाँचबुझ गरेर तथ्यसहितको प्रतिवेदन बुझाउने कार्यादेश दिएको छ । अब आयोगको समयसीमा २४ दिन बाँकी छ ।
यो अवधिमा सबै काम सकेर आगामी दिनमा यस्ता घटना हुन नदिन गरिनुपर्ने कानुनी सुधारबारे सुझावसहितको प्रतिवेदन आयोगले बुझाउनु पर्नेछ ।
