जिल्ला प्रहरी कार्यालय मकवनपुरले जिल्लाको दुई छुट्टाछुट्टै स्थानबाट १९२ किलो ६ सय ग्राम लागूऔषध गाँजासहित चार जनालाई पक्राउ गरेको छ । प्रहरी कार्यालय मकवानपुरले दिएको जानकारीअनुसार प्रहरी चौकी रातोमाटेबाट खटिएकाे प्रहरीको टोलीले हेटौंडा–१५ बाट १७५ किलो गाँजासहित दुई जनालाई पक्रेको हो ।
हेटौडाबाट पथलैयातर्फ जाँदै गरेको बागमती प्रदेश ०३–००१ च १५८४ नम्बरको पिकअप गाडीमा उक्त गाँजा फेला परेको प्रहरी कार्यालयले जनाएको छ । गाडीको ढालामा खाली क्रेटले छोपेर ल्याएको अवस्थामा गाँजा फेला परेको प्रहरी कार्यालयका प्रवक्ता प्रहरी नायव उपरीक्षक श्यामु अर्यालले बताए । प्रहरीले गाडी चालक मकवानपुरको बकैया गाउँपालिका–४ का २४ वर्षीय सुमन लामा र गाडीमा रहेका बकैया–११ का २४ ववर्षीय सुशील भोलनलाई पक्रेको छ ।
यस्तै, इलाका प्रहरी कार्यालय मनहरीको टोलीले राक्सिराङ गाउँपालिका–५ ढुङ्गुखोलास्थित बगरबाट १७ किलो ६ सय ग्राम गाँजासहित दुई जनालाई पक्राउ गरेको छ । शंकास्पद अवस्थामा झोला बोकेर हिँडिरहेका पर्सा पर्सागढी नगरपालिका–८ बस्ने ४६ वर्षीय देवीलाल सहनी र पर्सागढी–१ का ३२ वर्षीय रामनारायण रामलाई गाँजासहित पक्राउ गरेको हो । उनीहरूको शरीर तथा झोला खानतलासीको क्रममा १७ किलो ६०० ग्राम गाँजा फेला परेको प्रहरी प्रवक्ता अर्यालले बताए । गाँजासहित पक्राउ परेका चारैजनालाई जिल्ला अदालतबाट म्याद थपेर आवश्यक अनुसन्धान प्रक्रिया अघि बढाइएको उनको भनाइ छ ।
