चार महिनाको अवधिमा ५१९ जना प्रहरी विभागीय कारबाहीमा परेका छन्। चालू आर्थिक वर्षको साउनदेखि कात्तिकसम्मको अवधिमा इन्स्पेक्टरसहितका प्रहरी कारबाहीमा परेका छन्।
प्रहरी प्रधान कार्यालयका अनुसार एक इन्स्पेक्टर, एक वरिष्ठ सइ, १५ सइ, ३८ असइ, १६ वरिष्ठ हवल्दार, ९९ प्रहरी हवल्दार, १०७ सहायक हवल्दार, २२९ प्रहरी जवान र चारजना कार्यालय सहयोगीमाथि विभागीय कारबाही भएको छ ।
यो अवधिमा दुई डिआइजीसहित तीन हजार ९७ जना प्रहरी पुरस्कृत भएको प्रहरी प्रवक्ता एसएसपी विश्व अधिकारीले जानकारी दिए । ‘आन्तरिक सुदृढीकरणलाई संगठनको प्रमुख प्राथमिकतामा राखेर कार्यसम्पादन भइरहेको छ । प्रहरी कर्मचारीहरूविरुद्ध पर्ने उजुरीलाई कसुरको गम्भीरताको आधारमा विभागीय कारबाहीको दायरामा ल्याइएको छ,’ प्रहरी प्रधान कार्यालयमा आयोजित पत्रकार सम्मेलनमा उनले भने ।
