ठूलो हिउँदे आँधीका कारण अमेरिकाको जनजीवन अस्तव्यस्त भएको छ । अमेरिकामा आएको हिम आँधीका कारण करिब ६ करोड मानिस प्रभावित भएको बीबीसीले समाचार प्रकाशित गरेको छ । जसका कारण सरकारले आपत्काल घोषणा गरेको छ ।
केन्टकी, भर्जिनिया, वेस्ट भर्जिनिया, न्युजर्सी, मिसुरी, केनसास, अरकनसालगायत राज्यमा आपत्कालीन अवस्थाको घोषणा गरिएको छ । ती राज्यका विमानस्थलहरूमा हिउँ जमेको छ । जसका कारण विमानस्थल बन्द गरिएको छ ।
साथै प्रशासनले सडक मार्गको प्रयोग नगर्न पनि चेतावनी दिएको छ । हजारौँ उडान रद्ध भएका छन् भने विद्यालयहरू बन्द गरिएको छ ।
उच्च मात्रामा हिमपात भएसँगै पछिल्लो एक दशकयताको रेकर्ड तोड्दै चिसो बढेको छ । केनसास र मिसुरी हालसम्म सबैभन्दा बढी प्रभावित भएको बताइएको छ । केही स्थानमा १० इन्चसम्म हिउँ जमेको बताइएको छ । केनसासका एक अधिकारी ब्रायन प्लान्टलाई उद्धृत गर्दै बीबीसीले लेखेको छ- पछिल्लो ३२ वर्षमा मैले १० इन्चभन्दा बढी हिउँ परेको देखेको थिइनँ ।
त्यहाँको मौसम विभागले मुलुकको मध्य भागदेखि पूर्वी तटसम्मका लगभग ३० राज्यको स्थिति गम्भीर हुन सक्ने चेतावनी दिएको छ । मौसम विभागका वैज्ञानिकहरूका अनुसार खराब मौसमका कारण ध्रुवीय चीसो हावा आउने सम्भावना छ ।
वासिङ्टन डीसी तथा फिलाडेल्फियासमेत थुप्रै ठूला शहरहरूमा पनि हिमपात हुन सक्ने आशंका गरिएको छ । सोमबारदेखि भने मौसममा सुधार आउनसक्ने आशा गरिएको छ ।
