अलौ–कोनिया सिमानाका हुँदै नक्कली बिलबिजक प्रयोग गरी भारतीय भैंसी–पाडा तस्करी, प्रशासनको मौनताले शंका गहिरिँदै

पर्सा,१९ माघ । पर्सा जिल्लाको अलौ–कोनिया सिमानाका प्रयोग गरी बिन्दवासिनी गाउँपालिका बरवा निवासी भुवन यादवले नक्कली बिलबिजक तयार पारेर पिकअप भ्यानमार्फत दिनहुँजसो भारतीय भैंसी र पाडाको व्यापक तस्करी गर्दै आएको आरोप लागेको छ । खुला सीमाको फाइदा उठाउँदै लामो समयदेखि संगठित रूपमा भइरहेको यस तस्करीप्रति स्थानीय प्रशासन र सुरक्षा निकाय मौन देखिएपछि घटनाले गम्भीर रूप लिँदै गएको छ ।स्थानीय स्रोतका अनुसार भारतबाट अवैध रूपमा भित्र्याइने भैंसी तथा पाडा नक्कली कागजातको सहायताले ‘कानुनी’ जस्तो देखाएर नेपाल भित्र्याइन्छन् । तस्करीमा प्रयोग गरिने बिलबिजक तथा ढुवानी कागजात नक्कली भएको दाबी गर्दै स्थानीय बासिन्दाले पटक–पटक सम्बन्धित निकायको ध्यानाकर्षण गराएका छन् । तर, कुनै ठोस कारबाही नहुनुले तस्करीमा संलग्न समूहलाई थप हौसला मिलिरहेको उनीहरूको भनाइ छ ।पिकअप भ्यानमार्फत रातको समय वा भीड कम हुने घडीमा सिमानाका पार गराइने भैंसी–पाडा सिधै भित्री बजारतर्फ पठाइने गरेको बताइन्छ । यसले एकातिर राज्यको ठूलो राजस्व चुहावट गरिरहेको छ भने अर्कोतर्फ स्थानीय पशुपालक किसानहरू प्रत्यक्ष मारमा परेका छन् । अवैध रूपमा सस्तो मूल्यमा भित्रिने भारतीय पशुका कारण स्वदेशी उत्पादनले उचित बजार मूल्य पाउन नसकेको किसानहरूको गुनासो छ ।स्थानीयवासीहरूका अनुसार तस्करी यति खुलेआम भइरहेको छ कि सुरक्षाकर्मी र प्रशासन अनभिज्ञ हुनै नसक्ने अवस्था छ । तर पनि मौनता देखिनुका पछाडि ‘मिलेमतो’को आशंका बलियो बन्दै गएको छ । यदि तत्काल निगरानी कडा बनाइएन र दोषीमाथि छानबिन तथा कारबाही अघि बढाइएन भने सीमावर्ती क्षेत्रमा अवैध कारोबार झनै मौलाउने उनीहरूको चेतावनी छ ।यस विषयमा सम्बन्धित प्रशासनिक निकाय र सुरक्षा कार्यालयसँग प्रतिक्रिया लिन खोज्दा आधिकारिक जवाफ आउन सकेको छैन । स्थानीय बासिन्दा, किसान तथा सरोकारवालाहरूले अविलम्ब छानबिन समिति गठन गरी नक्कली बिलबिजक, ढुवानी प्रक्रिया र संलग्न व्यक्तिहरूमाथि कडा कारबाही गर्न माग गरेका छन् । उनीहरूका अनुसार राज्यले समयमै कदम नचाले सीमावर्ती क्षेत्र अवैध तस्करीको सुरक्षित मार्ग बन्दै जाने खतरा बढ्दो छ ।