नेकपा (माओवादी केन्द्र) का अध्यक्ष पुष्पकमल दाहाल प्रचण्डले शान्ति प्रक्रिया टुङ्ग्याउनुपर्ने कुरामा राजनीतिक दलहरूबीच विवाद नरहेको दाबी गर्नुभएको छ ।
‘नेपालको सङ्क्रमणकालीन न्याय प्रक्रिया तथा द्वन्द्व पीडितहरूको सत्य, न्याय र परिपूरणीय अधिकार’ सम्बन्धी राष्ट्रिय सम्मेलनको आज काठमाण्डाैमा उद्घाटन गर्दै अध्यक्ष प्रचण्डले शान्ति प्रक्रिया टुङ्ग्याउने कुरामा पीडितहरूलाई उच्च प्राथमिकतामा राख्नुपर्छ भन्ने कुरामा राजनीतिक दलहरूबीच विवाद नरहेकाे बताउनुभयाे ।
उहाँले भन्नुभयो, ‘नेपालको शान्ति प्रक्रिया केही मौलिक ढङ्गले अघि बढेको छ । शान्ति प्रक्रिया टुङ्ग्याउँदै गर्दा मुख्यतः पीडितहरूलाई उच्च प्राथमिकतामा राख्नुपर्छ भन्ने कुरामा राजनीतिक नेतृत्व तहमा कहिल्यै विवाद भएन । अहिले पनि हामी राजनीतिक दलहरूको बीचमा विवाद छ । हामी प्रमुख दलहरू नै कोही सत्तापक्ष र कोही प्रतिपक्षमा छौँ । विवाद चलिरहेको छ । सदनमा बहस भइरहेको छ । यी तमाम विवाद र विमतिको बीचमा पनि शान्ति प्रक्रिया टुङ्ग्याउनुपर्छ भन्ने कुरामा हामीबीच कहिल्यै विवाद भएन ।’
प्रचण्डले विवाद र विमतिका बीचमा पनि देशको राष्ट्रिय मुद्दा भएकाले राजनीति गर्न हुँदैन भनेर आफूहरू लागिरहेको उल्लेख गर्नुभयाे ।
