बाराका प्रमुख जिल्ला अधिकारी (प्रजिअ) बसन्त अधिकारीको नेतृत्वमा सुरक्षा निकायका प्रमुखहरूको टोलीले बारा जिल्लाका सबै सीमा नाकाहरूको अनुगमन थालेको छ। सिम्रौनगढ कचोर्वाबाट सुरु गरिएको यो अनुगमन अभियान हरेक नाकामा गरिने प्रजिअ अधिकारीले बताएका छन्।
सामान्य जनताका लागि किनमेल तथा आवागमनमा कुनै अवरोध नहुने भए पनि तस्करी नियन्त्रणमा कुनै सम्झौता नहुने अधिकारीले स्पष्ट पारे।
यसअघि बिहीबार, तस्करी भइरहेको सूचनाका आधारमा प्रजिअ अधिकारी मटिअर्वा नाका पुगेका थिए। अनुगमनका क्रममा सो नाकाबाट अवैध रूपमा सामान तस्करी भइरहेको खुलेको थियो। उक्त समयमा नेपाल प्रहरी र सशस्त्र प्रहरीका एक-एक जना जवान ड्युटीमा खटिएका थिए। तर, उनीहरूले तस्करी नियन्त्रण नगरेको भन्दै प्रजिअ अधिकारीले तुरुन्तै निलम्बनको आदेश दिएका थिए।
प्रजिअ बसन्त अधिकारीले जिल्लाभर तस्करी नियन्त्रण, शान्ति सुरक्षा र सीमा नाकामा गैरकानुनी गतिविधि रोकथामलाई प्राथमिकता दिने बताएका छन्। साथै, उनले कानून कार्यान्वयनमा कुनै सम्झौता नगरिने चेतावनी समेत दिएका छन्।
