पर्सा । पर्सा प्रहरीले हुण्डी कारोबारमा संलग्न रहेको आरोपमा १० लाखभन्दा बढी नगद रकमसहित तीन जनालाई पक्राउ गरेको छ।
पक्राउ पर्नेहरूमा सखुवा प्रसौनी गाउँपालिका वडा नम्बर ४ देउरवाना निवासी २२ वर्षीय पवनकुमार साह, ३० वर्षीय मुस्ताक अन्सारी र १९ वर्षीय रामपुकार पासवान रहेका छन्। उनीहरूलाई जगरनाथपुर गाउँपालिका वडा नम्बर ३ गडैयाटोलबाट पक्राउ गरिएको जिल्ला प्रहरी कार्यालय पर्साका प्रहरी नायब उपरीक्षक राजु कार्कीले जानकारी दिए।
प्रहरीका अनुसार भारतबाट ना. १६ प ३०२० नम्बरको मोटरसाइकलमा सवार भई नेपाल प्रवेश गरेका उनीहरूलाई गडैयाटोलमा चेकजाँच गर्ने क्रममा स्रोत नखुलेको रु. १०,०२,०१० (दश लाख दुई हजार दश रुपैयाँ) नगद रकम बरामद गरिएको हो। बरामद रकम हुण्डी कारोबारसँग सम्बन्धित रहेको प्रहरीको भनाइ छ।
पक्राउ परेकाहरूविरुद्ध मुलुकी अपराध संहिता, २०७४ को दफा १२५ (क) बमोजिम (हुण्डी सम्बन्धी कारोबार गर्न नहुने) कसूरमा पर्सा जिल्ला अदालतबाट ७ दिनको म्याद थप अनुमति लिई थप अनुसन्धान भइरहेको प्रहरी नायब उपरीक्षक कार्कीले जानकारी दिए।
