दिल महमद मदरसालाई जग्गा दान गर्ने दाताहरू सम्मानित

बारा, विश्रामपुर — बारा जिल्लाको विश्रामपुर गाउँपालिका वडा नं. २ बरैनिया टोलस्थित दिल महमद मदरसालाई निजी जग्गा दान गर्ने दाताहरूलाई सम्मान गरिएको छ।फेटा गाउँपालिका–४ बतरा निवासी मरहुम दिल मोहम्मद मियाँका जेठो छोरा इब्राहिम आलमले ०–१–१४ (एक कठ्ठा १४ धुर) तथा विश्रामपुर गाउँपालिका–२ निवासी जलील मियाँ अन्सारीले ०–०–१० (१० धुर) जग्गा मदरसाका लागि दान गर्नुभएको हो।जग्गा दान गरेको उपलक्ष्यमा आयोजित कार्यक्रममा मदरसा परिवार, विश्रामपुर गाउँपालिका अध्यक्ष जुबेर अहमद, वडा अध्यक्ष मनोज कुमार यादव, वडा सदस्य मन्जुर आलम, मनीफ मियाँ, समाजसेवी कृष्ण प्रसाद साहलगायत स्थानीय गाउँबासीहरूको भव्य उपस्थितिमा दाताहरूलाई सम्मान पत्र प्रदान गरिएको थियो।कार्यक्रममा वक्ताहरूले शिक्षा क्षेत्रको विकासमा निजी जग्गा दानजस्ता योगदान अत्यन्त महत्वपूर्ण रहेको बताउँदै दाताहरूको प्रशंसा गरेका थिए।