पर्सा । सशस्त्र प्रहरी बल नेपाल पर्साले भन्सार छली गरी अवैध रूपमा नेपाल भित्र्याइएको १४ लाखभन्दा बढी मूल्यका कपडा तथा किराना सामान बरामद गरेको छ।विशेष सूचनाका आधारमा सशस्त्र प्रहरी बल नेपाल सीमा सुरक्षा गुल्म हे.क्वा. वीरगंजबाट सशस्त्र प्रहरी नायब उपरीक्षक विकास अधिकारी तथा सशस्त्र प्रहरी बल बीओपी बरैनियाका सशस्त्र प्रहरी निरीक्षक सन्तोष बजगाईंको नेतृत्वमा खटिएको टोली र वीरगंज भन्सार कार्यालय पर्साको संयुक्त टोलीले बारा जिल्लाको विश्रामपुर गाउँपालिका–५ नकटुवा विर्ताटोलस्थित एक गोठमा छापामारी गरेको थियो।सशस्त्र प्रहरीका अनुसार हाल खेतमा बाली नलागेको अवस्थाको फाइदा उठाउँदै भारतबाट सानो–सानो परिमाणमा कपडा चोरी तस्करी गरी विभिन्न स्थानमा जम्मा गर्ने र केही दिनपछि ठूलो परिमाणमा चितवनतर्फ पठाउने गरिएको विशेष सूचना प्राप्त भएको थियो। सोही सूचनाका आधारमा संयुक्त टोलीले छापामारी गर्दा भन्सार छली गरी भण्डारण गरेर राखिएको ११ लाख ७५ हजार ५ सय रुपैयाँ बराबरको १७ पोका कपडा बरामद गरेको जनाएको छ।
त्यसैगरी, पर्साको जिराभवानी गाउँपालिका–१ बलुवा क्षेत्रमा भारतबाट अवैध रूपमा ल्याई लुकाइछिपाई राखिएको किराना सामानबारे प्राप्त सूचनाका आधारमा सशस्त्र प्रहरी बल नेपाल सीमा सुरक्षा गुल्म हे.क्वा. भिखमपुर, प्रहरी चौकी बलुवा तथा वीरगंज भन्सार कार्यालय पर्साको संयुक्त टोलीले खानतलासी गरेको थियो।खानतलासीका क्रममा २ लाख ३५ हजार ५ सय रुपैयाँ बराबरका विभिन्न किराना सामान बरामद गरिएको सशस्त्र प्रहरीले जनाएको छ। बरामद गरिएका सामान आवश्यक कारबाहीका लागि वीरगंज भन्सार कार्यालय पर्सामा बुझाइएको छ।घटनाबारे जानकारी दिँदै सशस्त्र प्रहरी बल नेपाल नं. १३ गण हे.क्वा. पर्साका सूचना अधिकारी सशस्त्र प्रहरी नायब उपरीक्षक मोहनराज निरौलाले भन्सार छली तथा अवैध कारोबार नियन्त्रण अभियानलाई सीमा क्षेत्रमा थप कडाइका साथ सञ्चालन गरिएको बताए।
