बीरगंज – २८ मंसीर । मधेश एक्सप्रेस
नक्कली भुटानी शरणार्थी प्रकरणमा पुर्पक्षका लागि थुनामा रहेका पूर्वगृहमन्त्री बालकृष्ण खाँणले दिएको निवेदनमाथि उच्च अदालत पाटनमा आज सुनुवाइ हुने भएको छ ।
उच्च अदालतका न्यायाधीश कृष्णराम कोइरालाको एकल इजलासमा सुनुवाइ हुन लागेको हो । मंसिर १५ गतेको फैसलामा अरुका हकमा राय मिलेको भए पनि खाँणको हकमा दुई न्यायाधीशबीच राय बाझिएकाले तेस्रो न्यायाधीशकोमा पेस गर्ने निर्णय बमोजिम आज एकल इजलासमा सुनुवाइ हुँदैछ ।
आज सुनुवाइ गर्नेले यसअघिका दुईमध्ये जुन न्यायाधीशको राय समर्थन गर्छन्, त्यही आदेश कार्यान्वयन हुनेछ ।
१५ मंसिरमा उच्च अदालत पाटनले नक्कली भुटानी शरणार्थी प्रकणमा पूर्वमन्त्री टोपबहादुर रायमाझी, तत्कालीन गृहमन्त्री रामबहादुर थापा बादलका सुरक्षा सल्लाहकार इन्द्रजित राई, आङटावा शेर्पासहित ९ जनालाई थुनामै राख्न आदेश दिएको थियो ।
साथै भुटानी शरणार्थीका नेता टेकनाथ रिजाल, रायमाझीका छोरा सन्दीप रायमाझीलगायत अन्यलाई धरौटी र साधारण तारेखमा रिहा गर्न आदेश दिएको थियो ।
