वीरगन्ज । बिलबिजक भन्दा बढीको सामान लोड रहेको एउटा ट्रक पर्सा प्रहरीले नियन्त्रणमा लिएको छ ।
करिब ८१ लाख ५६ हजार ९४३ रुपैयाँ मूल्यका सामान लिएर वीरगन्जबाट काठमाडौं जाँदै गरेको ना ५ ख ३०२८ नम्बरको ट्रक प्रहरीले नियन्त्रणमा लिएको हो ।
वीरगन्ज महानगरपालिका वडा नम्बर २१ हनुमान मन्दिर चोक नजिकै आइतबारराति प्रहरीले उक्त ट्रक रोकेर चेकजाँच गर्दा बिलबिजक भन्दा बढी परिणामका हार्डवेयर तथा खुद्रा सामानहरु भेटिएपछि राजश्व छलीको आशंकामा उक्त ट्रक नियन्त्रणमा लिइएको पर्साका प्रहरी नायब उपरीक्षक कुमार विक्रम थापाले जानकारी दिए ।
थप अनुसन्धान तथा आवश्यक कारबाहीको लागि सोमबार राजश्व अनुसन्धान कार्यालय पथलैयामा बुझाइएको पर्सा प्रहरीले जनाएको छ ।
