बिरगंजमा युवकमाथि आक्रमण, हत्याको प्रयास असफल

बिरगंज, १७ कात्तिक बिरगंजमा एक युवकमाथि आक्रमण भएको छ। आक्रमणमा परि गम्भीर घाइते भएका बिरगंज महानगरपालिका-१६ का १९ वर्षीय मकबुल अलिको नारायणी अस्पतालमा उपचार भइरहेको छ। घटनामा संलग्न ब्यक्तिहरुले अलिको हत्या गर्ने प्रयास गरेको आरोप परिवारजनले लगाएका छन्। परिवारका अनुसार आक्रमणकारीहरूको पहिचान भइसकेको छ, जसमा बिरगंज-१६ ईनर्वाका मुम्ताज मिया तेली, रेयाज मिया तेली सहित तीन जना रहेका छन्। आक्रमणबाट घाइते मकबुल अलिसँग रहेको ५० हजार नगद र सुनको सिक्री लुटिएको आरोप पनि परिवारजनले लगाएका छन्। घटनाको सम्बन्धमा पर्सा प्रहरीले आरोपितहरूलाई पक्राउ गर्ने प्रयास गरिरहेको छ। हाल उनीहरू फरार रहेका छन्। पक्राउपछि थप अनुसन्धान गरी कडा कानुनी कारबाही गरिने पर्सा प्रहरीले जनाएको छ। वडा प्रहरी कार्यालय बिर्ताका प्रहरी निरीक्षक निरोज चौलागाईंले समाजमा अराजक गतिविधि गर्ने कुनै पनि व्यक्तिलाई कानुनले छुट नदिने बताउँदै कानुनअनुसार कारबाही गर्ने प्रतिबद्धता व्यक्त गरेका छन्। घटना लुटपाटको उद्देश्यले भएको हो वा व्यक्तिगत रिसिबीका कारण, यसबारे अनुसन्धानपछि प्रस्ट हुनेछ।