वीरगन्ज । पर्साको बहुदरमाई नगरपालिकामा एक जना किशोरीको शव बरामद भएको छ । नगरपालिकाको वडा नम्बर ८ रामनगरीबाट एक जना किशोरीको शव बरामद भएको हो ।
मृत भेटिनेमा स्थानीय रामबाबु सहनीकी १७ वर्षीया छोरी निजिमा कुमारी सहनी रहेकी पर्सा प्रहरीका प्रहरी नायब उपरीक्षक दीपक भारतीले बताए । रामनगरीस्थित बजारको पोखरीमा घोप्टो परेको अवस्थामा उनको शव भेटिएको प्रहरी बताउँछ ।
शनिबार बिहान पोखरीमा शव देखेपछि स्थानीयले प्रहरीलाई खबर गरेका थिए । घटनाको जानकारी पाएलगत्तै पुगेको प्रहरी टोलीले घटनाको प्रकृति मुचुल्का तयार पारी शव पोष्टमार्टमका लागी वीरगन्जको नारायणी अस्पतालमा पठाएको जनाएको छ ।
यसबारेमा आवश्यक अनुसन्धान सुरु भएको जिल्ला प्रहरी कार्यालय पर्साले जनायो । प्रहरीका अनुसार मृत भेटिएकी किशोरी दुइ दिनदेखि सम्पर्कविहिन रहेकी थिइन् ।
