बारा । बारामा यस बर्ष कृषकहरूले कुल १ लाख १९ हजार २ सय ८८ मेट्रिकटन आलु उत्पादन गरेका कृषि ज्ञानकेन्द्रका प्रमुख राजनारायण प्रसाद साहले जानकारी दिनुभयो ।
यस बर्ष कृषकहरूले विभिन्न जातको आलुखेती ७ हजार ४ सय हेक्टर क्षेत्रफलमा खेती गरि प्रति हेक्टर १६ दशमलव १ मेट्रिकटनले कुल १ लाख १९ हजार २ सय ८८ मेट्रिकटन आलु उत्पादन भएको ज्ञानकेन्द्रको प्रमुख साहले बताउनुभयो ।
यस बर्ष आलु खेती समयमा अविरल वर्षा भएको हुँदा किसानहरु फलफूल खेती तर्फ आकर्षित हुने गरेको हुँदा यस बर्ष आलु खेतीमा ४० हेक्टर क्षेत्रफलमा आलु खेतीमा कमी आएको कुरा ज्ञानकेन्द्रका अर्थ विज्ञ गणेश महराले भन्नुभयो ।
उत्पादित आलु हाल कलैया बजारमा प्रति किलो रु २५ देखि ३० मा बिक्री वितरण भइरहेको हुँदा २५ हजार मेट्रिकटनले कुल २ अर्ब ९८ करोड २२ लाख बराबरको आलु उत्पादन भएको अर्थ विज्ञ महराले जानकारी दिनुभयो ।
गतबर्ष कृषकहरूले ७ हजार ४ सय ४० हेक्टर क्षेत्रफलमा आलु खेती गरि प्रति हेक्टर १५ दशमलव ९ मेट्रिकटनले कुल १ लाख १८ हजार २ सय ९८ मेट्रिकटन आलु उत्पादन भएको थियो ।
आलु खेती जिल्लाको १६ वटै स्थानीय तहमा कृषकहरूले खेती गर्ने गरेको भएपनि प्रत्येक बर्ष आलु खेतीमा कमी हुँदै आएको कृषि ज्ञानकेन्द्र बाराले जनाएको छ । ७९ सालमा ७ हजार ४ सय ५०, ८० सालमा ७ हजार ४ सय ४० र ८० सालमा ७४ हजार हेक्टर क्षेत्रफलमा खेत गरिएको ज्ञानकेन्द्रले जनाएको छ ।
