वीरगञ्ज । गौर हत्याकाण्डमा मारिएकाहरुका आफन्तहरुले जनता समाजवादी पार्टी (जसपा)का अध्यक्ष उपेन्द्र यादवलाई उपप्रधान एवम् स्वास्थ्य तथा जनसङ्ख्या मन्त्री बनेकोमा आपत्ति जनाएका छन् ।
गौर हत्याकाण्ड पीडित संघर्ष समितिले आइतबार एक विज्ञप्ति जारी गर्दै अध्यक्ष यादवलाई मन्त्रिमण्डलमा सहभागी गराएकोप्रति प्रधानमन्त्री पुष्पकमल दाहालको ध्यानाकर्षण गराए ।
संघर्ष समितिका संयोजक रुपसागर उपाध्यायद्वारा विज्ञप्तिमा भनिएको छ, ‘पीडितसँग गरेको लिखित सम्झौता एवं प्रतिबद्धता विपरित उल्टै मन्त्री बनाउने कार्य आपत्तिजनक, दुखद एवं निन्दनीय मात्र नभई कानूनी शासनको उपहास पनि हो ।’
प्रधानमन्त्रीको यसप्रकारको क्रियाकलापले न्यायको परुखाईमा रहेका आफूहरूलाई झन् पीडित एवं मर्माहत बनाएको उपाध्यायको विज्ञप्तिमा उल्लेख छ ।
गौर हत्याकाण्ड पीडित संघर्ष समितिले यादव सो प्रकरणमा दोषी रहेको भन्दै कारबाहीको माग गर्दै आएको छ ।
